Antalyada Traktör və Güney Azərbaycan Rüzgarı: Yörük-Türkmən Festivalında Birlik və Dirəniş Mesajı

Antalya Böyükşəhər Bələdiyyəsinin ev sahibliyi ilə keçirilən 4-cü Beynəlxalq Antalya Yörük-Türkmən Festivalı bu il təkcə Yörük mədəniyyətinin deyil, eyni zamanda Türk dünyasının ortaq dəyərlərinin bir araya gəldiyi simvolik bir tədbirə çevrildi. 30 may – 1 iyun tarixləri arasında Döşəməaltı Düzlərçəmən Piknik Alanında baş tutan festivalda Güney Azərbaycandan gələn Traktör azarkeşləri qrupu xüsusi çadır quraraq tədbirə damğa vurdu.

Güney Azərbaycandan Yüksələn Səs: Traktör Azarkeşləri

Güney Azərbaycan türklərinin təşkil etdiyi Traktör azarkeşləri qrupu, qurduqları çadırla festivalda həm mədəni, həm də siyasi baxımdan mühüm bir mesaj verdilər. Çadırda Traktör futbol komandasının bayraqları ilə yanaşı, Güney Azərbaycan Milli Mübarizə bayrağı, Bütöv Azərbaycan bayrağı və digər Türk dövlətlərinin bayraqları da nümayiş etdirildi. Bu simvollar vasitəsilə Traktörün təkcə bir komanda yox, Türk dünyasının birliyi və dirənişinin rəmzi olduğu vurğulandı.

Çadırda illərdir İran rejiminin təzyiqlərinə baxmayaraq stadionlarda açılmış pankartların, Azərbaycan və Türkiyə bayraqlarının fotoları sərgiləndi. Bu görüntülər Traktörün sadəcə bir futbol klubu olmadığını, İran türklərinin azadlıq kürsüsü və susdurulmuş bir millətin səsi olduğunu nümayiş etdirdi.

“Azadlıq, Ədalət, Milli Hökumət” – Dirənişin Yol Xəritəsi

Çadırın mərkəzində asılmış “Azadlıq, Ədalət, Milli Hökumət” yazılı pankart festival iştirakçılarının böyük marağına səbəb oldu. Bu şüar Güney Azərbaycan türklərinin illərdir səsləndirdiyi əsas siyasi tələbi və milli iradəsini əks etdirirdi.

Traktör bayraqlarının üzərində yer alan “Azərbaycan yurdumuz, Traktör bozqurdumuz” şüarı isə tədbirin simvolik sözlərindən birinə çevrildi. Türk dünyası üçün strateji əhəmiyyətə malik olan Urmiyə ilə bağlı “Urmiyə türkündür, türkün qalacaq” şüarı da ayrıca diqqət çəkdi.

Milli Ruhu Canlandıran Musiqi və Rəqslər

Çadır qarşısında Azərbaycan xalq rəqsləri, Zəngəzur və Sulduz yöndəmsəl halayları ifa olundu. Milli ruhu əks etdirən musiqilər səsləndi. Ziyarətçilər əllərində Güney Azərbaycan, Qaşqay və digər türk yurdlarının bayraqları ilə şəkillər çəkdirərək həmrəyliyə çağırış etdilər.

Çadır, ziyarətçilər üçün sadəcə bir istirahət məkanı yox, tarix, mübarizə və milli şüurun canlı bir təmsilçisinə çevrildi. Festival boyu çadırın qarşısı izdihamla doldu.

GRUP GÖKTÜRKLER Səhnəsində Tarixi An

Festivalın son günündə səhnəyə çıxan GRUP GÖKTÜRKLER musiqi qrupunun konserti zamanı yadda qalan anlar yaşandı. Müğənni Bilgə Kağan Kara Traktör azarkeşlərini səhnəyə dəvət edərək onlara təşəkkür etdi və “Siz Türk dünyasının qürurusunuz” sözlərini söylədi. O, Traktör azarkeşlərinin hədiyyə etdiyi atkını qəbul edib, səhnədə digər Türk boylarının bayraqları ilə birlikdə dayanaraq böyük həmrəylik tablosu yaratdı.

Antalyadan Güney Azərbaycana Salam

Festivalın sonunda iştirakçılar tərəfindən Güney Azərbaycan və Traktör haqda müsbət və dəstəkverici fikirlər səsləndirildi. Ümumi qənaət bu idi ki, Traktör sadəcə idman klubu yox, Türk dünyasının birliyini və azadlıq mübarizəsini təmsil edən bir simvoldur.

Bu ilki Yörük-Türkmən Festivalı yalnız mədəni irsi deyil, eyni zamanda çağdaş dövrün siyasi və ictimai mesajlarını da özündə birləşdirən unudulmaz bir tədbir oldu.

Türk İləri Təşkilatından Güclü Mesaj

Festivalda iştirak edən Türk İləri Təşkilatı da Güney Azərbaycandakı qardaşlarının yanında olmaqla Türk dünyasına mühüm mesaj verdi:
“Güney Azərbaycan Türk dünyasının qızıl körpüsüdür və bu məsələ Türk dünyasının əsas davası olmalıdır.”